ترمومتر .. نبض الشارع .. بنات الموضة .. ورجال السبهللة !!
إب نيوز ١٦ يونيو
الله المستعان على كم من شنب، وعلى كم من رجال مسبع مربع ما عاد في حسه من شرفه وعرضه، وين كنا وفين قد احنا؟!! وكيف كانوا رجال زمان وكيف قدهم رجال هذه الايام؟!! عنوصة وموضة، وضاغط وطيحني واشطحني ولا عاد قيمة ولا رجولة!! والبنات نستغفر الله العلي العظيم ونتوب اليه، قد مظهرهن يغاثي البطون، مش أي بطون طبعا!! بس الذي عنده حمية وغيرة ووازع ديني وقبلي، أما الذي بيرضى لبنته واخته تخرج السوق ببالطوه سع وجهها فقبح الله وجهه!!
كيف كانوا رجال زمان؟!! رجال بكل ما للكلمة من معنى؛ تربية وغيره وحشمة وصراط مستقيم وتربية على تقوى الله وعلى الحياء والخزاء والقماء والبنت تخزى لما تكتسر من التربية الصالحة.
وطبعا هذا والكل متعلق بتربية الأم، والذي قدها مشغولة في المسلسلات والشيشة والتفاريط والمغنيات وفالي وفالش وطز في الدنياااااا، وكل واحد حر في حياته ولا كأن عليها مسئولية في الحياة، ونسيت كيف كانت تربية اهلها لها!! ما كانت تتجراء تتلفت يمين ولا شمال، وكانت تخرج للسوق في رأس السنة تشل كسوة للعيد وتروح!! وتخرج العرس ملثمة محشمة ليش!! انتوا داريين ليش؟! طبعا قد نسيتوا بس انا با اقلكم ليش، لانها عزبة! وانتوا قارنوا بين تربية زمان وتربية هذه الايام، وبين بنات زمان وبنات هذه الايام، وقلدكم الله اين أستر وأعز وأشرف للدين ولكم يا رجال؟!!
اخرجوا الاسواق ابسروا عرض الازياء، ابسروا لون بقرة بني إسرائيل كيف بيتزاقع في الشوارع، وركزوا على الحركات وامشي دلا!! والرجال والكل يمشي إلا والبنطلون لانص (ما عاد انا قايلة)!! سماجة ووقاحة وحقارة وقلة ذوق لابعد حد، والرسول صلوات الله عليه وآله قال: (إذا نزع الحياء انتزع الدين)، وقال: (الدين لباسه الحياء)، ما رآيكم يا متحضرين ويا متطورين؟!! قصدكم إنكم مسلمين وانتم على هذا الحال!! طبعا الكلام للرجال والنسوان!!
قد بنبسر واقع السعوديين و”الدسكو” الحلال والخمر الحلال وما بيفعلوه من فساد وانحلال أخلاقي ومجون وجنون وانفتاح زادوا فيه على اليهود ونرجع نقول الله يسترنا عاد اليمن في الخير!! لكن الصدق.. ما دام وقد بناتنا وعيالنا بينفتحوا والله ما مرزي لهم الا الصميل والا با يفعلوا اللي يقدروا عليه، وقد بيفعلوا وكل واحد داري!!
كل واحد يضبط اهله ويتقي الله في نفسه، وكل واحدة تحافظ على طهارتها وعفتها ومظهرها وشرفها وكرامتها، مافي المرة إلا شرفها والا هي مثل الزجاج إذا اكتسر ماعاد يتركب من جديد!! والامهات.. لاتتعذري وتقولي ماعاد تشتي البنت الا كلمتها، ابوه الهدار!! لو تشتي تضبطي وتخطي كلمتش والله لا تلبسيها طربال مش بس جلباب لكن خيرة الله؛ نرجع ندور اعذار يوم القيامة.
ولا قد حلقت وقد خرج الحمار السوق، كل رجال يطبق كلام الله: (وقرن في بيوتكن) ويوقع رجال، مش راكز الشنب ومشتبح بالجنبية وماشي جنب مرته وبنته في السوق وهن في مظهر يدل على قلة رجولته وسماجته .. وللكلام بقيه..
مع احترامي لكل شريف وشريفة، ولكل من حافظت على زكاء نفسها وطهارة قلبها، وكل من عرف قيمة رجولته وجسدها مبادئ في أرض الواقع، وحسبنا الله ونعم الوكيل .
إعداد : إكرام المحاقري
